領展贊助廣告 民主黨被批

領展贊助廣告民主黨被批

[2017.03.20] 發表

【明報專訊】民主黨上星期五舉行黨慶，喺送畀嘉賓嘅小冊子中，印有領展嘅廣告贊助。呢一則廣告喺網上引起風波，一眾左翼人士群起批評民主黨，斥該黨點解會收取領展贊助。黨內左翼黨員區諾軒形容「後欄發生這樣的事，直接否定了我從政的核心價值」。負責籌款嘅司庫袁海文話，一定有想過區諾軒嘅感受，仲強調該黨唔會因為捐款而改變立場。

民主黨黨慶結束後，網上左翼同社運圈子就瘋傳領展嘅廣告(圖)。區諾軒嘅facebook隨即變成爭論嘅主戰場，唔少人喺區嘅fb上留言批評民主黨，斥民主黨接納領展贊助係不道德，仲叫區快啲退黨。不過，黨友林紹輝幫手解畫，反駁批評者係咪需要成立一個道德重整委員會，審查泛民人士，「所有泛民公開有無收過煤氣公司、中電禮物派街坊，立法會議員有無同所有機構食過飯」。

籌款委員會主席、司庫袁海文就喺fb解釋，強調民主黨絕不會接受任何有條件嘅捐款，更不會因為捐款而改變立場。袁話，領展係相當具爭議嘅機構，「民主黨無意為其粉飾」，但希望網民批評廣告之餘，留意一下廣告內容，指廣告真正嘅主角係導盲犬，表明係希望可以透過廣告，讓社會更了解、尊重同愛護動物，一起支持導盲犬。區諾軒就話，「辛苦搞一個活動不容易，批評卻很廉價」，指民主派政黨要籌得一分一毫都艱難，話希望大家唔需要怪責幫黨慶籌款嘅黨內朋友。