【明報專訊】多個警察協會早前搞特別會員大會聲援被判囚的七警，有逾萬人參加，建制派立法會議員中，有大律師身分嘅梁美芬同容海恩，同埋律師何君堯都高調現身，喺台上撐場。不過佢哋嘅做法令部分網民不滿，更有人發起聯署，致函大律師公會同律師會，要求紀律處分佢哋。信件內容話，集會可能對負責七警案嘅法官構成壓力，又認為有人在場大講粗口，3個議員都冇阻止。

梁美芬噚日出嚴正聲明，話自己當時係以觀察員身分出席，認為聯署係扭曲事實，混淆視聽。佢強調立法會議員有權對市民關心嘅社會議題去了解、跟進，話呢啲無理指控係剝奪作為議員嘅言論自由，會對有關投訴內容保留追究法律責任嘅權利。