廉署出「跑馬仔」防貪指引
[2017.02.03] 發表
【明報專訊】特首選舉將喺下月開波，廉署為咗呢場選舉，推出全新編製嘅「選民/候選人支持者須知」單張，扼要簡介《選舉(舞弊及非法行為)條例》嘅重點；單張除咗提醒選民同候選人應做同唔應做嘅事，仲提醒候選人支持者，千祈唔好為咗促使或阻礙某候選人當選，發布有關候選人品格、資歷或以往行為屬虛假或者誤導嘅事實陳述。
資料單張分別有給予選民同候選人支持者嘅「注意事項」部分，例如選民索取或接受任何人提供嘅金錢同禮物，從而投票或唔投票畀某候選人，就會犯法；候選人支持者利用唔同宣傳平台為個別候選人宣傳或阻礙其他候選人當選，都係競選活動時較常遇到嘅舞弊陷阱，亦係違法行為。
廉署亦歸納過往選舉不同情景，用問答形式解釋條例，包括出席由候選人助選成員安排嘅免費晚宴、邀請候選人出席定期舉辦嘅研討會，同埋向候選人捐贈貨品或服務等。廉署廉潔選舉事務統籌鍾麗端話，法例無限制候選人支持者表達支持候選人嘅方式，但如果事先未得到候選人嘅書面授權，係唔可以涉及選舉開支，否則亦係犯法。
更多港聞
相關新聞
