單仲偕新年娛賓 唱Sound of Silence

單仲偕新年娛賓唱Sound of Silence

[2017.02.01] 發表

【明報專訊】特首選戰開始，資訊科技界選委、民主黨單仲偕當然有緊貼選戰，佢透露資訊科技界星期四就會同曾俊華見面，民主黨9號亦會見林鄭月娥。曾俊華赤口日就喺facebook談論經典英文歌Sound of Silence，單仲偕就話呢首歌對佢嗰代人，好有感覺，噚日Emily上佢屋企拜年，佢仲即席用唱K神器唱畀大家聽𠻹！

黨慶將邀4特首參選人

單仲偕無做議員幾個月，不時去潛水同滑雪，但佢似乎唔太習慣無咁忙，話再咁清閒隨時會發霉，所以打算新年之後要積極搵工，希望6、7月可以返新工咁話，點解仲要過幾個月先返工呢？原來單仲偕已經計劃特首選舉後去新西蘭玩兩三星期，5、6月又會去美國出席細仔畢業典禮。

佢話希望打返3年工，2020年到佢太太都退休，兩個就可以真正退休周圍去玩喇。

單仲偕話，無做議員後自己只係民主黨普通會員，但會幫手搞選舉及籌款，今年黨慶3月17日舉行，即係特首選舉前夕，佢話4個參選人都會邀請，但暫時仲未知邊個會到。

夢熊寄卡「患難見真情」

前全國政協委員劉夢熊𠵱家仲喺赤柱監獄服刑，大約本個月底會出獄，原來單仲偕同部分泛民人士都曾經去探監，劉夢熊聖誕節仲喺獄中寄聖誕卡畀佢，仲寫上「患難見真情」。