馬鐵8卡車 有人讚有人唔知

馬鐵8卡車有人讚有人唔知

[2017.01.16] 發表

【明報專訊】國產嘅馬鞍山線首兩部8卡列車噚日正式投入服務，以配合預計2019年建成嘅沙中線「東西走廊」發展。港鐵喺馬鞍山線月台加強指示，有乘客讚指示清晰，但仍有人唔知8卡列車已投入服務。

港鐵會將馬鐵15列4卡列車，逐步改為8卡，而兩列8卡列車噚日先投入服務。Emily噚日去大圍站，見到港鐵有喺馬鞍山線月台顯示屏顯示即將抵達列車車卡數目；喺第4卡車尾月台閘門及地面貼上啡色標示，第5卡至第8卡貼上綠色標示等，以分辨番4卡同8卡列車停車及排隊位置。港鐵又增派月台助理，用指示牌或揚聲器指示乘客去指定候車區。不過，即使有廣播提示下一班係8卡列車，唔少乘客都照舊去4卡列車位置等車，新增車廂位置(近車尾方向)相對較少人等車。

乘客鍾先生話，自從舊年11月馬鐵將列車停喺月台較前位置，佢為咗唔使「追車」，已習慣去車頭位置上車。有乘客就話唔知8卡列車已啓用，孔小姐話馬鐵「一時4卡、一時8卡」嘅安排好唔方便，寧願統一4卡或8卡。

乘客廖先生專程帶埋「鐵路迷」囝囝搭8卡列車，小朋友見到列車一刻仲好興奮咁用手機影相拍片。廖先生認為𠵱家8卡列車班次少，但明白改變需時，太趕住全面推行8卡列車容易出問題，佢並讚賞港鐵指示清晰。