葉太﹕好多廠商係老友 歡送中聯辦官員 稱唔係好熟

葉太﹕好多廠商係老友歡送中聯辦官員稱唔係好熟

[2016.12.29] 發表

【明報專訊】宣布會參選特首嘅新民黨主席葉劉淑儀，過去都話自己有同中央溝通，前日佢就參加各界商會聯席搞嘅中聯辦經濟部副部長楊益榮休歡送會，但就強調無傾到特首選舉。而邀請葉太出席活動嘅，就係工業界選委沈運龍。

工業界選委邀出席

呢個歡送會，齊集各界商會聯席會議60幾個唔同行業商會嘅會長、主席。葉太同Emily講，好多廠商係佢老朋友。佢話席間無傾過特首選舉，「因為我喺工業界服務過(葉太做過工業署長)，同好多工業界都熟，見番好多老朋友，影吓相，互祝節日快樂，無傾咩實質嘢」。問到佢與楊益嘅關係，葉太就話「(與楊益)唔係好熟，我同工業界熟啲」。

葉太早前宣布參選特首，競選口號「贏返香港」個「贏」字，以中西合璧方式設計，上半部分變咗好似個「(圖一)」字，下半部則與英文「win」結合，引起網民討論，葉太表明會繼續用呢個標誌。立法會前主席曾鈺成噚日就喺《am730》網上視像專欄「字言字語」分析「贏」字由來。佢話根據象形文字，「贏」字有個龍頭、一架船，仲有幾支船槳，「贏」嘅來源係撐船出海執貝殼，執到滿載而歸，視之為「贏」，而「贏」本來嘅意思就係做生意賺到錢。

曾鈺成指點葉劉競選標誌

佢話，贏字後來一直簡化，但「中間呢個貝字係保留嘅，唔少得嘅」，因為贏唔贏到「錢銀好緊要」。曾鈺成話近來「有人」用個贏字做競選標誌，「其中連個『貝』字都唔見咗，似乎贏唔贏得到就好有疑問」。

另一參選人、退休法官胡國興噚日就拜會長洲鄉紳，仲話聽取咗長洲區議員鄺官穩同居民對長洲社區欠缺殯儀設施嘅申訴，胡國興就話﹕「民生無小事，生老病死誰關顧？」

更多港聞