【明報專訊】港鐵都僭建？原來係講緊港鐵出口標示燈箱。噚日有網民話喺北角港鐵站B4出口發現有幾張由屋宇署發出嘅告示，上面話港鐵有個喺七姊妹道、由1樓簷篷底部懸掛嘅招牌同支撐架係無得到署方批准，所以違反《建築物條例》。

噚日Emily下午去北角港鐵站書局街樂嘉中心嘅出口望望，發現港鐵已經好快手咁拎走晒啲告示。Emily問番屋宇署，原來屋宇署最近喺北角七姊妹道展開「大規模違例招牌清拆行動」，視察過程中發現呢個小型招牌無按照「小型工程監管制度」下嘅規定而豎設，所以要按照《建築物條例》發出清拆令，命令涉事嘅招牌擁有人喺發出告示嘅60日內清拆招牌，仲話對方如果無喺指定日期遵從命令，又無合理辯解嘅情况下係會違法。港鐵就話，會為乘客提供安全舒適嘅乘車環境，會適切處理事件。