叫提修正案 潘兆平：我已經收番 梁君彥甩轆 打斷梁美芬發言

叫提修正案潘兆平：我已經收番梁君彥甩轆打斷梁美芬發言

[2016.12.02] 發表

【明報專訊】民建聯周浩鼎提出打擊「假難民」嘅無約束力動議，噚日繼續喺立法會舉行續會辯論，但大主席梁君彥去到投票階段突然「甩轆」，摷住文件咁打斷經民聯梁美芬嘅修正案發言，話要畀勞聯潘兆平提出佢嘅修正案先，但其實潘兆平一早收回咗自己個修正動議，大主席經提醒後先尷尷尬尬叫梁美芬繼續，搞到議事廳一度起哄。

當時工聯會何啟明嘅修正動議，指要將「假難民」等字眼以「被市民普遍視為『假難民』」代替，同時喺投票階段率先獲得通過。大主席隨之宣布撤回毛孟靜、涂謹申、潘兆平等議員嘅修正案，又畀梁美芬就佢提出嘅修正動議發言。

不過，大主席中途突然講咗句「對唔住」又叫停梁美芬，話應該要畀潘兆平講咗先。聞言嘅潘兆平隨即企起身，話「我已經收番(修正案)啦」，大主席呢個時候恍然大悟，細細聲話「哦，你收番」，再叫梁美芬繼續發言。

喺辯論中，有唔少建制派議員為周浩鼎今次嘅動議護航；自由黨鍾國斌同工聯會黃國健都話應該要設立禁閉營，以切斷難民來港嘅經濟誘因。但公民黨楊岳橋就話，認同現時免遣返聲請嘅審核機制有漏洞，但不能斷言所有人都係濫用制度，又話今年免遣反聲請申請數字已經下降。最終動議喺分組點票下，未獲過半數議員贊成，其中直選方面以16票對16票而被否決，泛民剛好守住否決權。

更多港聞