【明報專訊】資訊科技界立法會議員莫乃光(Charles)噚日搭的士好激氣，話連環被拒載，佢批評的士服務水平低、科技落後，仲一怒之下喺facebook留言講明，「總之，我一日喺立法會，的士加價我一定反對，的士永久性牌照我一定爭取改革收回，就同丁權一樣，香港太多咁嘅不公平條約，一定要盡辦法收番哂(晒)！」 理大返立會 司機拒過海 Charles噚日朝去咗紅磡理大宿舍出席講座，諗住中午前想趕返立法會投票，一出門口見有的士，但司機話唔過海，叫佢搭港鐵；咁佢跳上另一架的士，司機又唔肯過海，但送佢去火車站過海的士站，而佢落車先見到一條長龍，最後搞咗大半個鐘先上到車。今次車佢嘅司機伯伯送Charles到立法會，不過打印咗一張幾乎見唔到字體嘅「隱形收據」畀佢。 Charles同Emily講，佢喺紅磡嘅位置唔近港鐵站，又話search過google map，計過數話如果去搭港鐵，加埋行路同上上落落，時間會慢過坐的士，但估唔到會被拒載。Charles就後悔當時醒唔起可以叫Uber。 Charles喺fb大彈香港的士服務追唔上國際水平，形容「趕客、揀客、拒載、污糟、落後」，又話噚日上過幾部的士，司機大叔都無用電子導航，反而向佢問路，又只收現金，仲要提供「隱形收據」，大嘆香港坐的士好似時光倒流40年！
|
| |
| |
;){kind=small}
