【明報專訊】仲未同社會交代「To run or not to run」下屆特首選舉嘅財政司長曾俊華，喺港大民意研究計劃嘅「香港市民最熟悉的政治人物」排名上急起直追，由5個月前排第7位，急升至第2位。排頭位嘅繼續係特首梁振英(CY)。不過Emily提提大家，排名榜係量度知名度，同支持度無關。

港大民研噚日公布「市民最熟悉的政治人物」排名，調查於10月24至27日以真實訪員以隨機抽樣方式，電話訪問1001名香港巿民。結果顯示梁振英繼續居首，曾俊華排第2，社民連立法會議員梁國雄排第3。上次排名第10嘅食物及衛生局長高永文下跌至第31位。民建聯主席李慧琼從第21位上升至第9位，排位取代前特首董建華。

港大民研指無關支持度

港大民研話長期數據反映，梁振英、梁國雄、林鄭月娥、曾蔭權同黃毓民，都係屬於市民長期熟悉嘅本地政治人物。港大民研提醒，熟悉度排名同支持度無關，換言之，知名度排名好高嘅政治人物，唔一定係最受歡迎嘅政治人物。