【明報專訊】青年新政議員游蕙禎早前嘅「扑嘢論」引起社會熱議，「匯賢智庫」噚日舉行關於本港政局嘅研討會，主席葉劉淑儀都話游蕙禎嘅言論「某程度反映事實」。但葉太話「(扑嘢)太粗俗」唔想宣之於口，於是用「我們人類進行最正常嘅行為都無地方」去代替「扑嘢(做愛)」二字。 葉太喺會上話，北京同港府都要思考點解咁離經叛道嘅議員，例如青年新政嘅議員，可以獲選入立法會。葉太話可能好似學者袁彌昌所講，市民鍾意「清新政冶」，葉太形容：「西九龍選民見到一位金金哋色頭髮、留啲蔭嘅少女，覺得佢清新，唔知佢宣誓粗暴」。葉太仲話「扑嘢論」太粗俗，但某程度反映事實，「香港人，特別係年輕人，愈住愈細，愈住愈貴。香港市民感壓迫」。 談積金對冲 被笑選舉宣言 研討會講香港政局，一定提到來屆特首選舉。同場嘅立法會前主席曾鈺成聽到葉太提到政府有咁多儲備，點解唔拎出嚟，取消強積金對冲時，笑對葉太話「呢個係特首選舉宣言」。葉太聞言即刻講明「唔係，唔好擺我上枱，我以事論事，我係以評論員身分去講，純粹評論」。民主黨主席劉慧卿都加把口話「要計選舉經費」。
|
| |
| |
