【明報專訊】經民聯梁君彥前日當選立法會主席，即刻去信經民聯辭去黨主席職位，估唔到經民聯效率咁高，噚日執委會立即開會接納佢辭職要求，仲改選成個領導層，結果梁君彥「升呢」，「主席」銜頭前加料，變成榮譽主席。

經民聯新主席就由工程界立法會議員盧偉國接棒，而今屆經民聯立法會議員有新面孔，劉業強晉身議會之後增選做經民聯副主席，計埋本身都係副主席嘅林健鋒、張華峰同梁美芬，總共有4個副主席，而秘書長就繼續由石禮謙做；梁美芬亦會兼任地區事務委員會主席。