【明報專訊】教育局長吳克儉又自製「關公災難」。街工梁耀忠噚日喺facebook上載咗一張由吳克儉親筆簽署嘅祝賀信，信中祝賀梁耀忠喺立法會選舉「教育界功能界別」成功連任。阿忠不忘抽吓水，多謝局長祝賀之餘，同時希望局長了解佢係循超級區議會當選嘅。呢個post一出，唔使6個鐘就吸咗過萬個「讚好」、「哈哈」同「嬲嬲」。 局長為手民之誤致歉 真．教育界議員葉建源成日同吳克儉駁火，局長冇理由唔記得佢𠺝，局長新聞秘書同Emily講，局長衷心祝賀梁耀忠議員連任成功，對於信中嘅手民之誤，局長謹向梁議員致歉，將責成同事再次致函祝賀所有當選議員。言下之意，即係封信上面啲字，係局長嘅同事打㗎囉。 葉建源知道呢單嘢後，向Emily騷咗張局長簽名信，證明局長已經恭賀佢當選教育界議員，還幸呢封信無寫錯佢嘅資料。不過葉建源嘅拍檔、教協總幹事馮家強就繼續玩，喺fb推咗個「吳克儉：誰是真．教育界立法會議員？」post，提供多個選項，包括葉健民(城市大學學者)、葉建源、葉建忠(落敗嘅社福界候選人)、梁耀忠、譚耀宗(民建聯)，唔知吳局長能唔能夠分得清楚呢？網民就梗係齊齊口痕畀另類答案啦，立法會前議員楊耀忠、因民調風波下台嘅香港大學前校長鄭耀宗、藝人梁榮忠等都畀佢哋攞晒出嚟講。
|
| |
| |
;){kind=small}
