【明報專訊】《南華早報》已經畀阿里巴巴創辦人馬雲收購，「南早中文網」噚日突然彈出告示，話因為有「整合資源的需要」而要停止運作。《南早》回覆話，有4個員工因此受影響，公司會盡力安排內部調配。 《南華早報》同《南早指南》嘅中文網站噚日開始停止運作，輸入《南早》中文網嘅網址，就會立即轉咗去佢嘅全英頁面，而南早中文網嘅facebook專頁同Twitter帳戶噚晚開始亦再無更新。《南早》發言人同Emily講，今次嘅做法純屬商業決定，又話𠵱家有4個員工受影響，公司會盡力安排佢哋喺其他部門工作。 其實，《南早》中文網喺2013年7月曾刊出馬雲嘅專訪，其中馬雲話鎮壓六四民運嘅決定唔完美但正確，但《南早》後嚟突然將呢部分刪除，而負責嘅記者亦被停工。 噚日都有記者就網站停止運作問勞工及福利局長張建宗，張建宗無正面回應有無收到消息，佢話勞工處會密切留意事件嘅發展，有需要嘅員工可以向勞工處求助。
|
| |
| |
