【明報專訊】八九學運領袖王丹呢兩日喺fb透露，有香港電視台邀請佢去外地旅行，條件係叫佢帶埋一個同佢有矛盾嘅人，問完一輪網友意見後，佢篤定想邀請曾經係同路人，最後分道揚鑣嘅人同佢一齊去，未知對方應唔應約。

指與前學運領袖無矛盾

王丹出post話，覺得電視台嘅諗法「蠻有趣」，但就話諗唔到有咩人同自己有矛盾，即刻吸引逾200網友留言，有人問佢同吾爾開希、柴玲等前學運領袖有無矛盾，佢直接話無，其他提議包括有香港代表本民前嘅梁天琦、台灣代表歌手黃安，內地就當然唔少得中共總書記習近平等。

形容為「北大人的華山論劍」

諗咗一晚，王丹噚日朝早宣布打算搵北京大學中文系教授孔慶東，因為大家係「舊相識」同「八九一代」。孔慶東係中國共產黨黨員，近年推崇朝鮮制度，2012年喺內地網絡節目中3次話「香港很多人是狗」，但曾幾何時，佢同王丹喺1989年「同在民運最前線」，當時仲係北大學運籌委會主席。王丹話，孔慶東近年嘅變化令佢「吃驚」：「我們絕對是矛盾雙方」，又喺留言話「孔慶東若敢來，就是兩個北大人的華山論劍XD」，唔知孔慶東會唔會答應呢？

電視台未料嘉賓「泄密」

ViuTV發言人就話，《跟住矛盾去旅行》第二輯係出年嘅節目，成個節目內容、嘉賓名單同播映日期都仲構思緊，暫時要賣個關子，唔回應有無邀請王丹，亦唔講孔慶東唔出現點算，問到有無諗過會咁樣「泄露機密」，發言人話「係真係好unexpected(預料之外)」。