【明報專訊】鄉事派組黨最近無乜聲氣，不過上水鄉事委員會主席侯志強依然積極，開facebook專頁、擺街站派米派糉派單張，樣樣做齊，似乎即使組黨不成，對參選都躍躍欲試。 Emily聽聞侯志強今日晏晝又會有茶敘，喺鄉議局租咗個場，邀請新界東，包括北區、沙田、大埔約300名村民出席，仲請埋傳媒。唔通又有好戲睇？侯志強就話，因為9月立法會選舉將近，要研究吓新東選舉有無人出選，聽吓村民意見。侯強之前咁高調，佢會唔會趁機自告奮勇拉票？不過平日牙擦擦嘅佢就一改口風，話就算有人推薦自己，都要考慮吓先喎，又話出選立法會唔係小事。咁萬一無合適人選，係咪就此作罷？侯強話「都無計」，「唯有睇吓幫邊個抬轎啦」。佢又話幫邊個抬轎，要睇鄉議局支持邊個，自己無權決定。 其實鄉議局上月訪京，國務院港澳辦主任王光亞已經溫馨提示，希望鄉議局以大局為重，加強同其他愛國愛港陣營溝通、協調。唔知侯志強態度軟化，係咪同收到北風有關係？
|
| |
| |
