楊岳橋容海恩勢決戰新東

[2016.06.28] 發表

【明報專訊】9月立法會選舉預料有多張名單出戰新界東，其中公民黨楊岳橋(Alvin)打算競逐連任，而新民黨容海恩(Eunice)亦有意參選。兩人政治背景南轅北轍，但同樣係執業大律師，同被稱為政壇俊男美女，黨名又只差一個字，難怪Alvin噚日同傳媒茶敘，就透露曾經有中年男街坊以為Eunice都係公民黨黨員，問Alvin公民黨新東出兩隊，應該支持邊個好咁話。

楊：一人名單出戰唔打告急牌

講到選情，Alvin都承認Eunice係潛在對手，因為對方吸引到中產選民，近期宣傳亦少提政治議題，佢相信今次選舉「人人有機會，個個無把握」，形容經歷過新東補選，唔會假設選舉前一定風平浪靜。Alvin預計自己會組「一人隊」參選，即係無樁腳嘅一人名單，但唔傾向打告急牌。

考慮出選九龍東嘅公民黨譚文豪，「飛機師」形象深入民心，不過佢就話唔會著機師制服做選舉宣傳，「正如余若薇唔會戴假髮(做選舉宣傳)，郭家麒唔會著醫生袍」。

不過，譚文豪坦言仲諗緊點喺選舉中突出自己，對於特首梁振英「行李門」事件可唔可以做到選舉議題，曾經喺事件提出唔少專業意見嘅譚文豪，就話要視乎空姐就事件提出司法覆核申請成唔成功。