「保港運動」罵雙重標準 撐警團體鬧阿sir阻住

「保港運動」罵雙重標準撐警團體鬧阿sir阻住

[2016.05.30] 發表

【明報專訊】噚日支聯會發起遊行悼念六四27周年，「保衛香港運動」同「守護香港」等4個團體20多人，一如以往喺遊行起點灣仔修頓球場外發起「揭示六四真相」集會，呼籲途人要認清六四真相。呢班人一向係警方支持者，成日話警方處理示威衝突好合理，但噚日就槍口對住自己人，大鬧警察阻住佢哋集會。

集會未開始前，保衛香港運動發起人傅振中率先同警方爭拗集會位置，佢用手機展示舊年嘅示威區相片，激動咁話今年示威區細咗，又鬧警方雙重標準，容許支聯會喺遊行路線上派發傳單，但唔畀佢哋派，擾攘咗十幾分鐘。

指六四誇大市民反轟「有冇良心？」

在場警員就反駁，話咁樣安排係為咗公眾安全、公眾秩序，又話年年都係咁安排，並非第一年係咁，叫佢哋遵守指示。

集會開始，參與嘅人舉起寫有「呃足27年」、「騙取六四同情心」嘅標語，並向市民派發講解六四嘅小冊子，傅振中更高呼支聯會誇大學生嘅死傷人數，並隱瞞有軍警受傷嘅事實。佢嘅言論隨即引嚟參與支聯會遊行嘅市民不滿，有人更大聲質問佢「有冇良心？」、「有冇經歷過六四？」「女長毛」雷玉蓮就到場撒溪錢，並以玩具坦克輾過寫有「六四」嘅標語和血衣，佢其後同參與「揭示六四真相」集會嘅人爆發口角，結果又要勞煩警員到場調停。