【明報專訊】醫院管理局一連兩日嘅周年研討大會噚日開幕，醫管局行政總裁梁栢賢(PY)每年都會設計改圖博君一笑，今年為咗配合紓緩治療嘅主題，佢更不惜「出賣」自己嘅陳年照，由細個讀書時嘅童年相，至初做醫生時嘅青年相，又畫咗幾條皺紋幻想佢老年個樣，認真有誠意。PY解釋，佢每個人生階段都有唔同目標，希望老年時可以返母校踢場波，同埋去茶餐廳食個菠蘿包，最後仲想「死得有尊嚴」，所以要發展紓緩治療。

PY話，童年照係佢小一時影嘅，青年照係大約中五時嘅舊相，有口痕友話青年PY個look有幾分似劉華，PY就解釋嗰陣時興「溫拿樂隊」，好多人都會留長頭髮。

PY又話，2014年香港死亡人數有4.6萬，當中九成喺醫管局院舍離世，預算至2035年，香港死亡人數會增五成至6.9萬，要做好準備加強同社區組織合作及推動生死教育，做好臨終規劃。佢仲話，喺醫管局院舍離世嘅長者中，有四成來自護老院，所以要加強社區護理。

另外，醫管局又趁25周年推出新呔，圖案亦唔少得佢哋5隻「吉祥物」熊仔。