fb留言惹審查疑雲 舒琪向港台道歉

fb留言惹審查疑雲舒琪向港台道歉

[2016.04.12] 發表

【明報專訊】新成立政黨「香港眾志」嘅常委、電影人舒琪(圖)前日話有意出選立法會港島區，前晚就喺facebook發帖，提到原本接受港台邀請錄製前日播放嘅《香港家書》，後來取消錄音，又話「原因我唔打算講嘞」，並在fb附上原供家書刊載、寫畀10年後嘅契仔軒軒嘅家書，內容講到雨傘運動、電影《十年》等。呢個帖文內容欲言又止，難免令人關注事件係咪涉及政治審查，唔少記者包括Emily噚日搵佢查詢。舒琪事隔12小時後即昨午3時許，再於fb發帖，重申《香港家書》文章事件中，「這裏面沒有什麼story」，又話「負責與我聯絡的港台同事可能也會受到一些牽連或打擾」，請港台員工接受佢嘅道歉。

Emily係舒琪未出道歉文之前聯絡佢，被問到事件係咪政治審查，佢話絕對唔同意係審查，強調無話過被港台要求更改字眼，喺fb發文只係想解釋呢封家書嘅來源。港台發言人伍曼儀話，當時聯絡舒琪提及家書主題係「從金像獎爭議到香港創作空間」，舒琪完成文章後，同事希望佢可集中討論電影《十年》嘅爭議，經商討後雙方同意唔錄音，重申絕不存在審查。

Emily翻查最終前日嘅《香港家書》係邊個寫，發現係支聯會主席何俊仁，佢寫咗篇文〈內地聲援佔領人士被判囚是滅聲之舉〉，睇內容絕對可列入內地「敏感」文章之列。