【明報專訊】工聯會榮譽會長陳婉嫻(嫻姐)日前批評特首梁振英(CY)「剛愎自用」，但另一榮譽會長鄭耀棠就話嫻姐唔代表工聯會，強調工聯會同CY之間係「友好合作關係」，仲話CY喺勞工議題無「走數」。一直就標準工時等議題向CY「追數」嘅嫻姐，噚日向Emily隔空回應鄭耀棠，嫻姐話工聯會一向好開放，有唔同觀點不足為奇，自己批評CY剛愎自用只係個人立場啫。

不過，工聯會同CY係咪真係「友好」呢？嫻姐聞言即刻哈哈笑咗兩聲，然後簡單回應一句話「各人有各人嘅評價」，至於嫻姐點解笑，Emily就留畀大家想像喇。對於鄭耀棠話CY無「走數」，嫻姐亦話每人有唔同睇法，不過喺自己角度就有責任追番勞工議題喇。

除咗棠哥同嫻姐隔空駁火，另一元老、工聯會前副會長梁富華亦加入戰團，力撐棠哥，對棠哥話嫻姐不代表工聯會，「本人感到十分高興！」梁又話棠哥德高望重，證明咗事實。

另外，人大常委范徐麗泰噚日接受商台訪問，提到下年特首選舉，話如果CY尋求連任，而對手係泛民人士，佢會支持CY，但同時補充佢希望有多過一個建制派人士競爭，等佢有得揀。佢仲點名讚新民黨主席葉劉淑儀好勤力，對唔同事情都有見地。至於財爺曾俊華呢？范太就形容對方係「好稱職嘅財政司長」。