【明報專訊】民建聯多個大佬喺9月立法會都會退下火線，但前主席譚耀宗嘅去留依然未知。元老之一嘅出口界立法會議員黃定光(象哥)，噚日喺傳媒茶敘時就明言主張譚sir留任。象哥話，挽留譚sir係眼見建制派9月無召集人坐鎮，「無領軍人，點搞？」被問到現時民記主席李慧琼(Starry)有無能力揸莊？象哥話雖然Starry表現唔錯，但始終要有啲歷史，先有江湖地位。
立會主席 民記有人提梁君彥
而喺北京，民建聯3名政協噚日同傳媒食飯，大家一見到身兼政協嘅譚sir就「大主席」、「大主席」 咁嗌，皆因立法會主席曾鈺成唔會再參選，所以來屆立法會主席一職，呼聲最高嘅其中一人就係佢，譚sir就以多謝回應。不過Emily亦聽聞，有民記中人認為立法會主席應該留番畀功能組別嘅梁君彥做，畢竟到分組點票嘅關鍵時刻，譚sir地區直選嘅一票都至關重要。
保13個議席成最大目標
民建聯目前立法會出選嘅佈局已訂得七七八八，但新西同港島部署仍要再睇睇，不過，民記最大目標就係可以保持到現有13個議席。
另外，立法會財委會由於本周五、周六會加會審議高鐵超支撥款，唔少喺北京嘅議員明後兩日都要陸續返港開財會。喺北京嘅財會代主席陳鑑林都密切關注香港情况，話已經收到1300多份修正案，返港就要處理。
