【明報專訊】版權修訂條例草案噚日恢復審議，若今個星期無法通過就會正式拉倒。商務及經濟發展局長蘇錦樑噚日再度發起美食攻勢，足足帶咗4個「蘇氏芝士蛋糕」慰勞大家。局長早前買叉燒、蛋撻等為議員打氣，人民力量「大嚿」陳偉業笑言「啲嘢太cheap」，仲點名話自己最愛食cheese cake。唔知係咪想大嚿高抬貴手，局長噚日特意「加碼」，陳偉業話，「可能最後一次(開會傾條例)，臨別秋波請大家食番餐好嘅」。

局長「唔受得」無份食

蘇局長仲親自拎咗兩個蛋糕同一眾記者分享，話蛋糕來自蘇太食譜，由蘇太監製完成。Emily聽聞蘇太整蛋糕嘅手藝政界聞名，不過行家發揮專業精神，全部相機食先，搞到局長無奈笑言「蛋糕唔係用嚟影相，係用嚟食嘅」。

雖然大家食得好滋味，但局長就無口福喇，原來佢唔食得芝士蛋糕，因為受唔到奶製品。