【明報專訊】學民思潮前成員黎汶洛(Oscar)瞓身支持公民黨楊岳橋補選，不但因為助選而退出學民，更全天候陪住楊岳橋拉票，結果記者、市民影楊岳橋拉票，就梗係見到Oscar攝喺附近甚至中間位置，好似楊岳橋同本土民主前線梁天琦拉票相遇時握手合照，Oscar就攝咗喺兩個主角中間，十足十球證咁款！ 網民梗係無限創意無限改圖，將Oscar「攝入」唔同相片裏面；有人仲抵死，將狄卡比奧噚日攞奧斯卡最佳男主角嘅相，男主角手上嘅小金人獎座變成「真．Oscar」樣！ 戴健文做票站主任 唔少選民前日都盡公民責任去投票，中大政治與行政學系副教授馬嶽去中大票站投票時，就發現票站主任竟然係啱啱退休嘅前副廣播處長戴健文。馬嶽話當時都覺奇怪，點解搵到個咁高級嘅人去票站幫手，而戴健文同佢講，因為好想感受一下選舉氣氛，所以親身參與其中。 今次立法會新東補選有43.4萬人投票，投票率46.1%。7名候選中，1號劉志成(2,271票)同4號梁思豪(1,858票 )，因為攞唔到法例要求嘅3%選票(約1.3萬票)，會被沒收5萬元選舉按金。 劉志成梁思豪按金沒收 梁思豪噚日都無現身點票中心等待結果，而劉志成喺未公布選舉結果時已經話，自己知名度唔高，即使落敗都算合理。
|
| |
| |
;){kind=small}
