黃成智 劉志成缺席 大狀梁思豪「捱義氣」唔去英語論壇
[2016.02.18] 發表
【明報專訊】新東補選大戰在即，各候選人馬不停蹄出席唔同選舉論壇拉票。香港電台噚日就舉辦咗首場英語論壇，但有3人拒絕出席，得番民建聯周浩鼎、公民黨楊岳橋、本土民主前線梁天琦，以及獨立方國珊。
劉志成認英文差 上節目「無嘢講」
報稱董事嘅劉志成就好坦誠，解釋自己中五畢業，英文唔好，即使上到節目都係「無嘢講」，所以唔會出席。佢話與其浪費時間，不如做吓實際嘢，比如多整幾份宣傳單張。曾經被網民嘲笑英文差嘅新思維黃成智亦選擇缺席，但就強調同語言能力無關。佢話因為要到上水、粉嶺同沙田拉票，行程已經排滿，又話自己把聲最近沙晒，「英文講得再好，大家都聽唔到啦」。
黃成智﹕無關語言能力
不過，最離奇係「體雕大狀」梁思豪，照理說大狀講英文應該好流利，但佢為咗「捱義氣」放棄出席論壇。梁思豪解釋，得知有人拒絕出席英文論壇，覺得唔可以因為語言問題，令自己比其他候選人優勝，所以基於公平公正原則而拒絕出席。Emily就聽聞，港台星期五另外一場英文節目，3人亦會同樣缺席。
更多港聞
【明報專訊】民建聯立法會議員何俊賢（高佬）喺2014年底結婚，噚日喺立法會派利市，大家都祝佢早生貴子。高佬就好坦白咁講呢件事「做緊」，即係計...
詳情
相關新聞
