【明報專訊】民主派喺版權條例修訂草案上拉布，多次要求點算法定人數，響鐘之時泛民亦唔會行返入會議室，希望製造流會，搞到建制派好嬲，雖然建制派諗到新策略對付響鐘，令打鐘次數大減，但建制派條氣始終唔順，經民聯盧偉國就向主席提議，要求主席點算人數時，計埋唔在席嘅泛民，因為佢哋靈魂喺度喎。

指泛民「無恥無賴嘆為觀止」

話說噚日立法會辯論由黃毓民提出嘅休會待續議案，盧偉國發言時話，原本唔打算講嘢幫手拉布，但聽到泛民是非顛倒、倒果為因嘅言論，甚至以冒犯言論挑戰建制派議員，好似話「軀殼在，靈魂不在」、「冇腦」及「冇獨立意志」，佢有如「骨啃住喉」，不吐不快。盧偉國批評泛民無恥，全體離開會議廳，將人數責任推晒畀建制派議員，又嘲笑堅持留喺議會力保不流會嘅議員，「無恥無賴令人嘆為觀止」，質疑泛民即使唔喺議事廳內，但「軀殼不在，靈魂在」，建議「下次有泛民議員要求點人數時，請主席數埋泛民議員的靈魂，我哋就一定夠法定人數」。

主席曾鈺成喺佢發言後一面嚴肅咁話，唔能夠採納佢嘅建議，因離開軀殼嘅靈魂，只會係鬼魂，而立法會點算法定人數，「只算活人，不算鬼魂」。