【明報專訊】第一屆「香港國際創客節」前日開始一連3日舉行。Emily噚日湊熱鬧去咗創客節嘅「十大國際青年創客」頒獎禮，睇下一班創客有幾國際，有幾創新。去到會場，Emily發現候選嘅創客大部分都係來自內地嘅朋友，活動主要係用普通話。出席頒獎禮做頒獎嘉賓嘅恒基副主席李家傑話，中國有成十幾億人，所以香港𠵱家應該好好利用中國嘅市場。
Emily之前睇大會網頁，話獲獎創客會得到重量級投資人面對面做創業指導，仲有機會贏得高達1000萬嘅「投資意向」。Emily就好好奇乜叫「投資意向」，大會籌委會主席邱達根就同Emily講，評審當中有好多投資者，以佢哋嘅分量，幫創客撮合一兩單投資機會，相信都應該個數唔只1000萬咁少啦。
噚日公布嘅「十大國際青年創客」，8個嚟自內地，有一個係香港人，佢就係GoGoVan嘅創辦人林凱源。
