「法律界桂綸鎂」搞青專網 群星拱照

「法律界桂綸鎂」搞青專網群星拱照

[2015.12.02] 發表

【明報專訊】年輕人創業成為近年熱門話題，主打協助青年創業嘅「香港青年．專業網絡」(青專網)噚日正式成立，目標係凝聚一班專業青年，提供創業支援、法律意見及實習機會。「青專網」由有「法律界桂綸鎂」之稱嘅大律師容海恩(Eunice)牽頭成立，唔好睇佢年紀輕輕，噚日啟動禮就有好多重量級政商界嘉賓撐場，包括創科局長楊偉雄、新民黨主席葉劉淑儀、廠商會前會長施榮懷以及人權大律師潘熙等。

認中聯辦幫助籌備

「青專網」仲即場同深圳三大創意基地，包括前海管理局、橫琴管理委員會及深圳華南城簽訂合作協議，聲稱係本港首個同時獲得三大基地支持嘅民間團體。除此之外，Eunice話「青專網」已同阿里巴巴集團初步接觸，爭取創意基金，有望半年內有好消息。個會咁架勢，連中新社、新華社噚晚都有派人採訪。

可以同內地有咁強大嘅聯繫，Emily梗係八卦一下係咪獲得中聯辦「祝福」啦，Eunice坦言籌備期間中聯辦喺背後出咗唔少力。動作多多，又與葉劉淑儀行得咁埋，唔知Eunice有無興趣踏上從政之路？佢就笑言對政治無咩興趣，又覺得喺唔同崗位上都可幫到人。

咁一向鍾情高質素人才嘅葉太，又想唔想搭跑道幫吓Eunice？葉太話明白Eunice好忙，所以無邀請佢加入新民黨，但其實Eunice一早已成為佢早前牽頭嘅「海上絲綢之路協會」會員。

更多港聞