港中大戰 馬逢國撲唔到飛 何俊賢撐兩隊 長毛無興趣

[2015.11.05] 發表

【明報專訊】「港中足球大戰」一票難求，連尊貴嘅立法會議員都呻買唔到飛，當中包括代表體育、演藝、文化及出版界嘅馬逢國，馬逢國話𠵱家唯有寄望會獲邀入場睇波。今次「港中大戰」或多或少都有啲中港矛盾嘅火藥味存在，被問到撐中國隊定香港隊，建制派議員都「耍太極」，個個都話兩隊都撐。

馬逢國：感情上想香港贏

馬逢國話﹕「感情上想香港贏，理智上國家隊實力強啲。」佢話希望實力強嘅一隊可以贏，但強調香港隊鬥志好強，加上喺旺角主場踢，相信今次勝算係「五五波」。馬逢國仲話「期待香港隊上半場入到一球」。

身為體育界嘅立法會議員，馬逢國話好多朋友都搵佢幫手撲飛，佢唯有叫助理噚日一早幫手上網買飛，可惜都係買唔到喎。

民建聯立法會議員何俊賢都係波友，噚日亦呻買唔到飛，仲話諗過去排隊買飛，但因為要開立法會大會所以打消念頭。佢話比賽當日只好睇電視直播。至於想邊隊贏，佢話自己中港兩隊都撐，最緊要有好波睇，仲話希望兩隊一齊努力，可以雙雙出線。

身為波友嘅社民連梁國雄(長毛)竟然話唔會睇「港中大戰」，因為覺得兩隊足球水平唔高。但長毛話足總唔應該將場波擺喺旺角場踢，一來唔夠位，會助長黃牛飛，二來香港大球場草地適唔適合作賽，應該由亞洲足協決定，唔係由足總決定。

更多港聞