【明報專訊】雖然有人認為香港人要「去殖」，但Emily噚晚去咗首屆英國文化節Best of British，活動都幾有氣氛。添馬公園首次化身成為露天戲院免費播放英國電影，吸引咗約100人參加，市民坐草地，望住5米乘9米大嘅熒幕，有人仲帶埋野餐墊瞓喺草地睇戲。

變露天影院 設美食攤位

文化節噚日起一連三晚8點播電影，噚晚播咗1975年英國喜劇《聖杯傳奇》(Monty Python And The Holy Grail)。草地擺放咗56張沙灘椅畀貴賓坐，同場設美食攤位，賣傳統英式小食炸魚薯條、啤酒同爆谷，仲有英國標誌嘅紅色電話亭畀參加者影相。

喺學校工作嘅李小姐特登報名參加，佢話好難得可以抬頭望吓星，趁住近幾日秋風起，戶外睇戲最合適。曾經喺澳洲讀書試過戶外睇戲嘅陳小姐話，覺得比預期中少人，但場地好寬敞同舒服；同行嘅鄭先生話係為咗感受露天戲院氣氛先嚟，覺得既然香港有咁大嘅公共空間，政府應該好好利用，舉辦多啲同類活動畀港人享樂。