【明報專訊】官場唔少唱得之人，眾所周知食物及衛生局前局長、現任平機會主席周一嶽出席活動時大多會獻藝，而佢嘅繼任人、現任局長高永文都唱得兩嘴，噚日佢出席香港泌尿腫瘤科學會活動時，一班醫生同病友就請咗佢上台jam歌，高局長大開金口唱咗首「社運名曲」《海闊天空》，病人代表就話，首歌想寄語病友無論治病幾辛苦，都要堅持落去。高局長唱到七情上面，仲話自己「老花」，所以睇「貓紙」時皺晒眉頭。

另外，提起前列腺癌，好多男士都覺得難以啟齒，向來身體麻麻嘅高局長話自己就快「登六」(佢今年58歲)喇，都仲未去做前列腺檢查，不過佢已經同好多男士一樣擔心健康，例如去廁所嗰時，見到隔籬嘅人「(小便時)快自己咁多」，或多或少都會有陰影喎。當主持人問佢對一班病人有乜嘢鼓勵，高局長講笑話，「我都等緊大家鼓勵我」。