【明報專訊】TVB台慶劇《梟雄》星期一(26日)首播，第一集講述建國大學學生火燒燕子窩——即鴉片竇嘅場口，引起網民熱論，有網民話無綫製作馬虎，話戲裏面嘅人用火「燒鴉片」，就等同全部人一齊吸毒一樣。 不過，無綫企業傳訊部宣傳科副總監曾醒明解釋，呢場戲係建國大學學生怒燒燕子窩呢個地方，包括嗰度嘅鴉片，所以唔係正式「銷煙」。 網民話馬虎 無綫：拍法根據歷史 曾醒明話，喺第3集最後一節有「正式銷煙」嘅過程，劇情係先倒石灰水，再放火燒煙。曾醒明話，咁拍法係經過資料蒐集，根據歷史去拍。 《梟雄》播出「銷煙」一幕，都有配字幕輔助，寫上「公元1930年，上海公開銷煙，先以石灰，再用桐油燒毁」。「燒煙」定「銷煙」喺網上引起熱論，有網民話「全城吸鴉片」、「個編劇一定係中史唔合格」，有網民討論銷煙嘅方法，包括林則徐嘅「海水浸化法」同「煙土拌桐油焚毁法」。曾醒明話坊間有唔少人關注呢一幕，TVB會喺節目《東張西望》詳細解釋。
|
| |
| |
;){kind=small}
