【明報專訊】上星期五有船撞到汲水門大橋，搞到要封橋檢查，令大嶼山變「孤島」，無綫(TVB)第二日就有個報道，話2002年時政府曾經提出興建北大嶼山至元朗公路嘅十號幹線，但就話「當時民建聯及自由黨認為沒有需要建新路，公民黨及民主黨亦反對」，結果引發民主黨、民建聯都先後去信，要求TVB澄清。

當年卿姐仲喺前綫 公民黨未成立

民主黨問題就比較簡單，因為當日投票紀錄清楚顯示，當年民主黨議員好似張文光等，都係投票支持項目；現時嘅黨主席劉慧卿雖然反對，但佢當時仲喺前綫，根本唔係民主黨人。而於2002年時，公民黨更加未成立𠻹。

錯就要認，TVB噚日回信畀民主黨單仲偕，話佢哋發現錯咗後，即時刪除該條新聞，及後改正，之後報道有強調民主黨係支持嘅，仲話「新聞及資訊部就該則新聞向民主黨致歉，並會督促同事小心核實、查證報道內容」。單仲偕話民主黨其實只係要求澄清，難得TVB道歉，都算係咁。

至於民建聯，佢哋覺得政府當時向立法會提出嘅並唔係涉及連接大嶼山嘅對外交通部分工程撥款。可能問題複雜啲，所以至今仲未收到TVB回覆。