【明報專訊】世界衛生組織轄下機構出咗份話加工肉類可致癌嘅研究，Emily同唔少平日鍾意食腸仔蛋早餐同餐蛋麵嘅朋友，都唔知點算好；Emily噚日去咗警察隊員佐級協會嘅38周年會慶酒會，碰到警務處長盧偉聰，「一哥」話其實佢近年都已經好少食呢類肥膩嘢，仲笑笑口話年過50歲，飲食都要節制一下，睇嚟呢個研究對佢影響應該有限。

李sir：想知金華火腿有冇問題

唔知係咪紀律部隊出身嘅阿sir，健康意識都比較高，同場嘅副保安局長李家超話，佢平日早餐多食麥皮，所以世衛研究結果對佢都無乜影響，仲向Emily推介麥皮做早餐夠晒健康，食粥澱粉質高，反而會食肥人。李sir仲分析個研究，話太側重西方飲食文化，有講煙肉腸仔等加工肉類，而佢自己就比較想知道金華火腿有無呢個問題呢。

警協酒會 湖南公安中聯辦到場

噚日嘅警察協會酒會，警隊高層盡出，協會主席陳祖光致辭時話，噚日仲請咗訪港嘅湖南省公安廳人員出席，Emily都見到中聯辦警聯部副部長李民真都有到場。