區選8人撤資格 或多兩人自動當選

區選8人撤資格或多兩人自動當選

[2015.10.23] 發表

【明報專訊】選舉管理委員會早前公布區議會選舉收到935份有效提名，即8個參選人提名不獲確認，Emily噚日核對參選人編號同區選參選人名單，發現離島、西貢、沙田等區都有參選人係無選舉號碼，其中離島嘅南丫及蒲台區，及荃灣福來區都分別得番一個民建聯同一個工聯會嘅參選人，換言之兩人可望自動當選，令區選自動當選人數增至68，但最終仍要等選管會刊憲確認。

無選舉號碼嘅人相信係因為被取消參選資格，而無得抽選舉號碼，8人都係報稱無政治黨派或獨立人士，包括「國師」陳雲喺沙田徑口區嘅「國舅」楊偉業、沙田鞍泰區嘅黃家勝、中西區水街嘅李崇威、灣仔鵝頸區嘅戴卓賢、荃灣福來區嘅石威廉、離島南丫及蒲台區嘅鄭志華同GOHEL Rajen Indulal，以及西貢寶怡區嘅陳艷珠。

阿基：論壇齊人樂意出席

另外，出選深水埗麗閣嘅民協前成員黃仲棋噚日寫咗封公開信畀對手、民協馮檢基，話阿基拒絕出席傳媒嘅選舉論壇，仲話阿基唔應該逃避同對手嚟一場公開比併。

阿基回應話，拒絕出席論壇嘅係建制派參選人，佢好樂意出席所有參選人都參加嘅選舉論壇。佢話黃仲棋唔指控建制派，反而針對佢作失實、無意義嘅批評，覺得好詫異。Emliy聽電子傳媒行家講，阿基係要所有參選人齊人先肯做論壇，唔齊人就唔肯做。工聯會陳穎欣會喺麗閣選區同馮、黃二人競逐議席。

更多港聞