【明報專訊】警察最近喺facebook開咗個專頁，但無論出咩post都被網民不停留言洗版。噚日天氣轉涼，「香港警察」fb page就貼圖提醒大家「記得要添衣」，張圖有個著住黃衫藍鞋嘅漫畫少女，另寫住「秋天到了」。

「七警案要拖多少個秋」

但有網民似乎唔多領情，有人「讚」警察「有如慈母一般的關懷」，亦有大批網民繼續問七警案進度，不過唔少網民嘅留言即使係講七警案嘅，都同警察個post有關㗎，好似「七警打人案要拖多少個秋天？」亦有人話「秋風及黃葉告訴我們：一年了，七警還未被起訴！」有網民就話「著多件衫防唔防到警棍亂扑人」。

當然，留言都唔係清一色淨係鬧警察嘅，亦都有唔少撐警網民多謝警方提醒，又叫警察都記住添衣，都要多多保重。