被指「蛇齋餅糉」 尹兆堅呼冤

被指「蛇齋餅糉」尹兆堅呼冤

[2015.09.14] 發表

【明報專訊】民主黨葵青區議員尹兆堅近期似乎好黑仔，繼早排舉報可疑選民登記畀人乘機批評佢煩到街坊後，連準備中秋送月餅畀街坊，都畀人「報料」質疑「賄選」！

中秋節將近，其實唔同黨派嘅區議員都會送月餅畀街坊，而噚日有人向Emily報料，話有人將上萬個月餅，送去民主黨副主席尹兆堅嘅區議員辦事處，認為阿尹用甜頭收買街坊，係為自己「洗底」喎。報料者又話，見到阿尹辦事處門口貼海報，會喺9月30號派米。阿尹同Emily解釋，為咗配合區議會節日工作小組，早前向商界籌咗一筆錢，買月餅送街坊。

稱只幫手派換米券

報料者似乎唔係好妥民主黨，話民主黨一向諷刺建制派係靠「蛇齋餅糉」收買人心，「民主黨有口話人，無口話自己」。阿尹解釋，多個政黨都會趁中秋派餅，自己過去只係批評有政黨事無大小都經常送福袋、送米，有時連強積金講座都要請食下午茶。阿尹話，投訴人質疑佢買咗過萬隻月餅，但佢話民主黨喺該區有十幾個議辦，大家一齊訂餅，每人都係派幾百個餅，「唔好吹咁大，邊有幾萬隻餅」，但佢話臨近區選，預咗對手會全面抹黑佢。

至於派米一事，阿尹就話早前有佛堂請泰國高僧祈福，所以請區內多個議員嘅辦事處協助，向街坊派「祈福米」嘅換米券，佢只係其中一個幫手派發換米券嘅議員，唔知點解幫街坊做事都會被人屈「賄選」。