【明報專訊】近期退休政府規劃師薛國強成為咗新聞人物，皆因佢早前向城規會提出取消金鐘至中環一帶電車路軌嘅申請，觸發咗唔少市民發起保育電車行動，唔少網民更質疑背後政府係咪有份指使。政府發言人噚日特地發出聲明劃清界線，澄清政府從來無提出要取消中環至金鐘段嘅電車服務，亦唔係政府委託顧問嘅建議。
大讚電車環保班次密
政府仲大讚電車服務嘅好處，話電車喺現行嘅交通政策下，係橫跨整個港島北岸、服務班次頻密、無路邊廢氣排放，兼係收費廉宜嘅公共工具，平均每天更為18萬人次提供服務，充分發揮輔助功能，強調呢項政策並無改變；又指城規會會按既定程序處理所有申請。
不過，面對咁大嘅反對聲音，薛國強噚日喺電台節目重申，話港鐵西港島線已經完全取代電車，認為市民唔應該抱殘守缺，又話自己平日好少搭電車，更聲言以自己嘅速度，如果由金鐘步行至上環西港城，「我行路可能快過搭電車」。香港電車公司董事總經理魏文噚日亦首次回應事件，話係第一次聽到有人提出取消電車嘅建議，強調政府無就事件接觸電車公司，又話取消電車，係偏離本港作為綠化及可持續發展城市嘅發展方向。
