231青年大使服務遊客

黃雋康

【明報專訊】青年協會同旅遊事務署合作，噚日委任231名年輕人做「香港青年大使」，佢哋嘅職責，係嚟緊駐守喺海洋公園、PMQ元創方等旅遊點，為遊客提供旅遊資訊。上年做過大使嘅黃雋康話，其間接待過唔少內地遊客，雖然有啲人會批評內地客唔夠文明，但阿康都幫內地客講好話，話內地客「嚟到都會畀香港守秩序文化感染」，有時都會幾友善咁話喎。

阿康上年服務咗超過300小時，獲頒香港青年大使計劃金章。佢同Emily講，舊年曾喺長洲太平清醮用咗個半鐘，以英文向一名美國旅客解釋太平清醮嘅活動做緊乜，仲話自己本身都好鍾意本地歷史文化，服務前會做好資料蒐集。

香港青年大使計劃嘅職務係向旅客介紹香港同提供旅遊資訊，仲會參與一啲大型旅遊推廣節目，推廣香港唔同地區嘅特色同優質服務文化。新一批大使噚日喺旅遊事務專員朱曼鈴帶領下，宣誓就任。