【明報專訊】香港大學下月1號召開畢業生議會特別大會，會員將就幾個動議投票，包括由校友關注組提出嘅30天內確認副校長任命，同埋另一班校友提出嘅支持港大10院長聲明嘅動議，即係要求港大最高決策層秉承院校自主原則，並批評學生衝擊校委會。
前幾日有畢業生喺網上呼籲支持10院長聲明，又不點名批評校友關注組嘅動議，指係「由政黨背景人士發起，旨在製造政治議題」，署名係曹萬泰，同畢業生議會常委、駐京辦前主任同名同姓，曹呼籲校友填授權書寄去畢業生議會，授權佢代為投票。Emily噚日欲透過畢業生議會秘書處搵曹萬泰，但電話打唔通。
有一班校友成立「支持十院長聲明校友組」，今日喺《明報》刊登50多人聯署，包括港大畢業生議會常委、兒科醫生李家仁，指校友關注組動議影響大學獨立運作。
另一邊廂，校友關注組亦諗住擺街站收集校友嘅投票授權書，但畢業生議會常務委員會噚日就發聲明，話要小心處理個人資料，絕不鼓勵以街站收集授權。校友關注組副召集人麥東榮話擺街站主要係想引起關注，會好小心處理個人資料。
