【明報專訊】今年9月中去開台灣嘅朋友，不妨留意吓由港台文化合作委員會、康文署合辦嘅「香港週2015@台北」。大會今年嘅主題係「繼往開來，活在當下」，以當代藝術為主，當中包括3個唔同嘅展覽同3個舞台作品。Emily發現，鍾景輝(King sir)同陳國邦兩師徒有份參演嘅《相約星期二》都榜上有名。

《相約星期二》喺2007年首演，至今已累積近百多場公演，主要講述師徒情。King sir話，1970年代以後就無去過台灣，今次係佢再度踏足台灣，而且公演咗8年，佢今年終於同戲中角色同齡，大家都係78歲。

King Sir仲分享話，起初想用眼淚去控制觀眾情緒，但後來改變演法，眼淚愈來愈少，話想藉此畀觀眾更投入當下嘅情緒。

「香港週2015」喺9月11日至10月11日期間於台北舉行，不過留意番，展覽同活動嘅地點日期不一，去之前記得睇清楚喇。