【明報專訊】第8屆模擬立法會噚日舉行閉幕禮，參加者經過兩個月體驗終於完成，噚日亦向唔同黨派議員分享成果，包括討論咗4條法案，好似修訂《廣播條例》，檢討電視發牌制度；修訂安老院條例加入記分制等；通過集體談判權；亦有討論《基本法》23條立法。4條法案中，除咗23條外，另外3條都喺模擬立法會通過，但唔同黨派議員都話，相信結果喺現實唔會發生喇。 卿姐：願加班通過集體談判權 噚日活動邀請咗立法會主席曾鈺成、民主黨劉慧卿、公民黨梁家傑、經民聯盧偉國、自由黨鍾國斌同工聯會郭偉強，對學生所做嘅4條法案點評一番。大家對集體談判權嘅法例能夠通過都感興趣，梁家傑質疑商界根本唔會支持；卿姐更加話如果現實通過到，立法會加班立即通過有關法例又點話呢。 鍾國斌就話商界唔係唔幫打工仔，但香港大部分都係中小企，相信集體談判權係大企業先用得着。盧偉國更加話如果上述法例能通過，相信社會爭議更大，無理由公司請人都要同打工仔傾，如果真係咁，相信港大都唔會有聘任陳文敏做副校長嘅風波喎。 盧偉國：委員會審電視牌如廢行會 對於模擬議員通過檢討電視發牌制度，由現時特首會同行政會議決定，改為由170人委員會決定，成員包括市民、相關專家、議員等，盧偉國對此反應更大，話咁樣廢除行會權力，令佢諗起文革時嘅革命委員會，仲話要質詢吓扮經民聯嘅同學仔點解要咁投票喎！
|
| |
| |
;){kind=small}
