【明報專訊】特首梁振英(CY)上任後，不斷強調「土地問題」，令「土地問題」一時成為網上熱話。CY雖然放緊假，但或者都知道網民心掛掛都係諗住呢個問題，所以休假中噚日都發表網誌，強調「有土地才有房屋，有土地才能在短中長期解決住屋不足的問題」。 梁振英話，根據政府最新數據，未來3至4年，連同貨尾、未售樓花和隨時可動工項目可提供8.3萬個單位，較去年同期嘅7.3萬個單位，多出1萬個，屬於再創新高。佢又羅列一堆早幾日已經公布嘅數字，重申未來3至4年可提供約8.3萬個單位。 CY話期待同事再接再厲，繼續努力搵地，亦希望市民尤其地區持份者明白，樓宇供應唔增加，點可以回應廣大渴望置業嘅市民？佢又發炮，質疑「以各種手段『拉布』，阻撓土地供應工作的人士，意圖為何？」不過，CY就無解釋喺邊項議程拉布令土地供應受阻。但部分立法會議員，早前則喺財委會就創科局撥款拉布。
|
| |
| |
