黃智賢被寶貝女融化 Pepper嬌嗲 Cream Cream可愛
【明報專訊】型男黃智賢體型健碩，但他抱着一對嬌小玲瓏的愛犬Cream Cream及Pepper時，自然流露出柔情一面，有時更肉緊得捉着狗仔面珠咀嘴。摩天使狗女Cream Cream和T-cup貴婦狗女Pepper同是3歲，活潑可愛，是黃智賢與太太的心肝寶貝。他們沒有生育計劃，已視Cream Cream及Pepper如女兒看待。
記者﹕葉靜文 攝影﹕梁迺楠
與太太有共識不想生B
黃智賢(Ben)說﹕「我同太太都不想生BB，人是需要有點牽掛，我哋將愛投放在Cream Cream及Pepper身上，好像出外食完飯都心急返家睇『女』。見到牠們過得開心，食得、睡得，無憂無慮，我同太太也感到好安樂。養狗可以盡情去寵牠們，如果是人，怕讚得太多會驕傲。牠們是寵物狗，不會倚靠牠們看門口、捉老鼠，牠們是來𧨾主人開心，可以盡情去惜牠們，帶給我和太太好多歡樂與樂趣。」
寵物店遇上 抱在手不捨得放
Cream Cream及Pepper來到黃家，源於Ben養了15年的約瑟爹利狗女CoCo病逝，他與太太都不開心，後來在寵物店先後遇到牠們，覺得很合眼緣。Ben說﹕「初初見Cream Cream時，牠個樣有啲懵懵哋，隻眼dum dum哋又嗲，就覺得係牠喇！抱在手不捨得放低。加上摸上手好滑及白色，便叫Cream Cream。Pepper眼神好靚，有點似CoCo，決定揀牠。初初養時Pepper好奀瘦，成隻馬騮仔咁。現時牠毛鬆鬆有時似個鬼婆，但講體型其實只有Cream Cream的一半。」
Pepper睡中間 Cream Cream瞓牀尾
每隻狗仔個性都不同，Pepper最嗲最黐人又會呷醋，Cream Cream則最緊要食，吃完便在一邊睡覺不會理你。Ben形容個性有點似貓。「Pepper就可以唔食都要黐人要抱抱，只要我一坐梳化，牠就上來，所以我在家工作時不會坐低。Pepper唔鍾意畀人困住，一困牠就吠天光，同你死過。Cream Cream亦有發脾氣及呷醋之時，如我帶Pepper出街無帶牠，回來就會有篤尿。夜晚牠們一定上牀睡，Pepper一定要睡在我同太太中間，Cream Cream就無所謂睡牀尾。還有估不到Cream Cream雖然較大隻，但會畀Pepper『蝦到』，Pepper可以在Cream Cream的飯碗攞嘢食，換轉就唔可以。牠們平時在家會嬉戲互相追着尾來咬，又圍着梳化追逐，好好笑。」
尊重太太意思 不養大狗
Ben外形Man爆，選擇養嬌小愛犬全因尊重太太意思。
Ben說﹕「我鍾意大狗，但太太害怕。養細狗較易打理，就算不得閒，牠們都可以在家自己玩，有姐姐照顧。現在回想，以前得CoCo在家會好寂寞，有個伴玩吓好些。至於選擇養狗女亦是太太意思，狗女嗲些又得意。」
