【明報專訊】香港中華廠商聯合會會長李秀恒嘅金寶集團，斥資近5.5億，買咗葵涌一棟工廈，改建成甲級商廈KC100，而為咗脫離「工廈」舊形象，佢將新商廈嘅大堂開放畀藝術家舉辦展覽，亦捐出150萬作為首年營運基金。李秀恒仲想打政府主意，向政府提交計劃書，希望租用對面嘅政府地，協助本地青年團體營運藝術廣場。

李秀恒話，希望員工及商戶能夠「天天上班，天天看展覽」，所以免費提供大堂畀有質素嘅藝術家搞展覽。場地目前展出緊李秀恒個女李楚洳嘅畫作，8月中旬就會舉辦「企業家的藝術世界」展覽，會邀請商經局長蘇錦樑剪綵。佢希望此舉能夠提升集團營商檔次，提高產品形象，仲話想將葵涌區改造成類似「北京798」嘅藝術區喎。

金寶集團營運總監游傑智話，集團兩年前向政府提交計劃書，希望租用大廈對出一塊佔地3000呎嘅政府地皮，協助香港國際青年文化交流中心營運藝術廣場，打算用嚟擺放雕塑、舉辦青年表演等等。

除咗KC100，李秀恒仲搞緊兩個活化工廈計劃，將位於黃竹坑及油塘嘅工廈改建成酒店。