狀元揀特首 過半無心水 暫無人選CY連任

[2015.07.16] 發表

【明報專訊】作為社會未來主人翁，一班文憑試(DSE)狀元都有關心時事，講起想揀邊個做特首時，暫時無人話想支持梁振英(CY)連任，部分人認為參選人嘅政綱係最重要。CY似乎要做多啲工夫，提高佢喺年輕人心目中嘅地位，萬一想競選連任時都有多啲人支持嘛！

3人選余若薇

今年有11個7優狀元，Emily見一班狀元通識科咁高分，就問佢哋一啲貼身嘅社會議題。例如，政改被否決，如果狀元們有得揀，佢哋會揀邊個做特首呢？

Emily畀人名等狀元揀，都係坊間盛傳嘅熱門或可能人選，包括CY、新民黨葉劉淑儀、財爺曾俊華、政務司長林鄭月娥、公民黨余若薇，又或佢哋自己嘅心水。11人當中，有3個狀元話想揀余若薇，嚟自港大同學會書院嘅郭俊勤大讚余若薇思路清晰兼口才好，又覺得佢可以理性咁同建制派溝通。

除咗余若薇，有人揀曾鈺成，亦有人揀林鄭。Emily有畀CY佢哋揀，但餘下6個狀元都唔講出心水人選，亦無話撐CY。藍田聖保祿中學女狀元黃海旋話如果CY連任，恐怕會有更多民怨，佢覺得特首應得到香港人嘅信任，能夠代表到香港人嘅聲音。除咗黃同學，唔少狀元都話特首政綱好重要，同埋要肯聽人意見。

無人贊成港獨

近年本土意識升溫，好多年輕人都話只會講自己係香港人，有啲人仲喊「港獨」。狀元們都話中國同香港分唔開，普遍覺得自己係中國嘅香港人，佢哋11人都無話贊成港獨，參與過佔領運動嘅順德聯誼總會梁銶琚中學狀元高梓諾，認同自己係中國人身分，但認為政策都應該係要香港人優先。

更多港聞