【明報專訊】鰂魚涌「巨墩避雨亭」早前成為網上熱話，由於巨型座基已經佔咗遮蓋逾一半空間，被居民鬧爆阻碇兼避唔到雨，區議會早前就提出改善有關設施，要用大約20萬元。民主黨東區區議員趙家賢噚日就喺商台節目《在晴朗的一天出發》表明絕對有保留，但就被同樣係東區區議員嘅民建聯鍾樹根質疑，好多居民都需要相關設施喎。 趙家賢喺節目引述，fb專頁「樂活鰂魚涌」已收集居民簽名，反對當局再使錢將避雨亭改建座椅，10日嚟已有逾200人簽名支持。佢話居民意見已經好清楚，希望當區區議員唔好再做掩人耳目式諮詢。 鍾樹根倡搬去柴灣 不過鍾樹根就唔同意，話如果當區唔滿意，咪將該避雨亭放去第二區，相信好多區都需要喎。主持人問趙家賢，如果擺喺佢選區，佢接唔接受，趙表明反對，質疑係浪費公帑。但鍾樹根就表明「你唔要咪算囉」，仲建議可以將避雨亭放去柴灣，「可能柴灣有居民需要呢！」 雖然避雨亭所屬選區嘅議員係民建聯，但鍾樹根就認為民政事務總署對避雨亭有不可推卸責任，質疑總署唔應該只迎合區議員，「泥水佬整門，過得門口(自己)過得人，你自己認為唔得，點解要畀人？」
|
| |
| |
