【明報專訊】立法會香港總商會代表林健鋒喺政改投票時有份令建制派離場，結果方案低票支持下被否決，商會盛傳有會董要求林健鋒問責辭職。總商會噚日開午餐會，幾乎所有出席嘅會董都「封口」，傳出有意接替林健鋒做議員嘅總商會理事、裕華國貨董事總經理余鵬春，更喺午餐會後一支箭標入?，令記者大為錯愕。

副主席﹕唔係唔撐 係無意見

總商會常務副主席、九倉主席吳天海就只係話對政改遭否決失望，強調商會已出新聞稿，至於林健鋒係咪鑄成大錯，吳天海話「我無評論，因為我不能代表總商會」，強調連用個人身分都唔想發表意見。有記者問佢咁係咪即係佢唔撐林健鋒呢？吳天海就急急澄清，強調係無意見，叫記者唔好搞錯。

總商會總裁袁莎妮被問到覺唔覺得林健鋒要問責時話，「較早前我哋已經講咗，我哋對於(政改)否決咗，覺得很失望」，至於總商會係咪會開會傾吓？袁莎妮話噚日只係星期一，早前都係準備緊午餐會，未有時間咁話。總商會成員、投資推廣署前署長盧維思話，林健鋒的確要負上好大程度嘅責任，但唔認為對方唔應該再代表商界做議員。