【明報專訊】基本法委員會副主任梁愛詩噚日接受民主黨主席劉慧卿嘅網台節目《議會內外》訪問，但似乎佢兩個有少少「認知障礙」。劉慧卿介紹詩姐時，就話對方係前政務司長，詩姐就糾正對方自己係前律政司長；到節目後段，詩姐就話卿姐係「公民黨黨魁」，搞到卿姐笑唔停。 雖然場面搞笑，但節目期間火花亦唔小，話說詩姐覺得泛民應該要同中央溝通，佢質疑對方點解京官約立法會議員，卿姐都唔出席，卿姐強調如果無回鄉證令佢唔可以自由進出內地，佢就唔會再踏足內地。詩姐就覺得返內地同中央溝通，同有無回鄉證係兩回事，話唔知對方做咗乜嘢事搞到無回鄉證。 當卿姐強調要自由進出內地後，詩姐就提出，如果想自由進出內地，「咁你都唔應該反對其他內地人進出香港」，卿姐立即反駁，話香港地方細，承受唔到內地人湧嚟，但「大陸咁大，100個劉慧卿返去都無事！」
|
| |
| |
