城市論壇大聲公病逝 家人維園辦追思會

城市論壇大聲公病逝家人維園辦追思會

[2015.05.18] 發表

【明報專訊】「維園阿伯」又少一個。每逢周日嘅《城市論壇》，總會有一班阿伯喺場外大呼小叫，當中有一人形象鮮明，因為佢每次出場都會攞住個「大聲公」(擴音器)，狙擊出席嘅泛民人士，有時仲大聲過主持人，但無乜人知道佢叫乜嘢名。噚日早上11點，維園涼亭旁邊就舉行咗一個小型追思會，悼念呢個第一代嘅大聲公梁銀樹。

謝志峰讚守規矩

梁銀樹於今年3月30日因肺炎病逝，享年84歲，佢1959年加入香港泥水建築業職工會，一直推動勞工運動，維護工人權益，1989年開始活躍於城市論壇，手持大喇叭發表意見，故又有「喇叭梁」稱號。噚日追思會約有50名市民出席，包括工聯會、香港泥水建築業職工會，仲有「維園阿哥」任亮憲。梁伯嘅仔女同幾個孫喺追思會上先後發言，其子梁志豪話，阿爸一生致力推動工運，為工人發聲，深感自豪及驕傲，會繼承阿爸嘅政治理念。

大聲未必代表無禮貌，城市論壇主持謝志峰話梁伯其實好守規矩，從無使用暴力，通常會喺節目前後、過場時間先至發表意見，表現佢對國家嘅愛同對國家進步嘅追求，無形中樹立咗動口不動手、絕不粗口嘅榜樣喎。